Veikara jen hjálpaði til við að ýta Nikkei vísitölunni upp á mörkuðum í nótt. Markaðirnir bíða þó í eftirvæntingu eftir að heyra ræðu Seðlabankastjórans í Bandaríkjunum, Janet Yellen sem verður á föstudag í Jackson Hole, Wyoming, á ársfundi seðlabankans.
Sony, Toyota og Nissan hækka
Meðal hlutabréfa í Japan hækkaði Sony Corp um 2,15% í kjölfar tilkynningar fyrirtækisins um verðhækkun á PlayStation plus þjónustu sinni.
Japanskir bílaframleiðendur hækkuðu einnig vegna væntinga um að sterkara gengi Bandaríkjadals muni gera japanskan útflutning samkeppnishæfari. Toyota Motor Corp hækkaði um 2,05%, Nissan Motor Co. Ltd. hækkaði um 2,72%
Quantas flýgur hærra
Í Ástralíu hækkaði Quantas Airways um 1,47% í kjölfar tilkynningar um sögulegan hagnað eftir uppgjörsárið. Mun fyrirtækið borga arð sem nemur 7 áströlskum sentum á hlut, en það er fyrsta arðgreiðsla fyrirtækisins síðan árið 2009.
Helstu hlutabréfavísitölur á svæðinu:
- Nikkei 225 vísitalan í Japan hækkaði um 0,61%
- Kospi vísitalan í suður Kóreu lækkaði um 0,30%
- Taiwan Weighted vísitalan lækkaði um 0,15%
- Hang Seng vísitalan í Hong Kong lækkaði um 0,77%
- Dow Jones Shanghai vísitalan í Kína lækkaði um 0,24%
- FTSE China A50 vísitalan lækkaði um 0,47%
- S&P/ASX 200 vísitalan í Ástralíu hækkaði um 0,14%
- Dow Jones New Zealand vísitalan lækkaði hins vegar um 0,80%