Velta á fasteignamarkaði dróst nokkuð saman milli vikna í vikunni sem leið eða um 25% samkvæmt upplýsingum frá Fasteignamati ríkisins (FMR).
Nánar tiltekið var veltan í vikunni rétt rúmir 1,7 milljarðar króna en var í síðustu viku 2,3 milljarðar en lítil breyting hefur verið á veltunni síðustu þrjár vikur.
Á myndinni hér til hliðar má sjá breytingu á fjögurra vikna meðalveltu á milli ára. Fasteignasala sveiflast gjarnan mikið á milli vikna og þess vegna er horft til meðalveltu fjögurra vikna og breytinga á henni milli ára.
Fjöldi þinglýstra kaupsamninga var 62 í vikunni sem leið en 66 samningum var þinglýst í vikunni þar áður.
Meðalupphæð á hvern samning var í vikunni 27,9 milljónir króna sem nokkuð undir meðalveltu en meðalvelta á hvern samning frá áramótum eru 32,5 milljónir.
Meðalvelta á viku frá áramótum er tæplega 2,4 milljarðar en þá hefur 72 samningum verið þinglýst að meðaltali á viku frá áramótum.
Á ársgrundvelli hefur velta á fasteignamarkaði dregist saman um 74% og gefur það heildstæðari mynd af fasteignamarkaði. Kaupsamningum hefur fækkað milli ára og er vægi hvers kaupsamnings meira fyrir vikið. Auk þess getur hver samningur falið í sér fleiri en eina eign auk þess sem eignir eru mismunandi.
