Tvær stærstu bílaleigur landsins skiluðu rúmlega hálfs milljarðs króna hagnaði árið 2015 og veltu samtals 8,7 milljörðum króna.

Jókst velta Alp hf. sem rekur Avis og Budget-bílaleigurnar og Bílaleigu Akureyrar/Höldur um 1,5 milljarða króna á árinu 2015 að því er fram kemur í umfjöllun DV um málið.

Síðan þá hefur fjöldi ferðamanna og væntanleg umsvif bílaleiganna aukist enn meira, en upplýsingarnar eru fengnar úr ársreikningum fyrirtækjanna.

Í júní árið 2015 voru 16.358 skráðir bílaleigubílar í umferð og eiga þessi tvö fyrirtæki umtalsverðan hlut í þeim fjölda.

Eignir langt umfram skuldir

Námu rekstrartekjur Alp hf. rúmum þremur milljörðum króna á umræddu ári, en þau höfðu verið rétt rúmlega 2,3 milljarðar árið 2014.

Jókst hagnaður fyrirtækisins úr 121 milljón króna í rúma 231 milljón króna á milli ára. Eignir fyrirtækisins voru metnar á 4,8 milljarða en skuldir á rúma 4 milljarða í árslok 2015.

Ef skoðaður er samanburður við ársreikninga árið 2010 sést að þá voru rekstrartekjur Alp um 1,3 milljarðar króna, sem þýðir að aukningin á fimm árum nam 130%.

Velta Bílaleigu Akureyrar jókst um 159%

Rekstrartekjur ársins 2015 hjá Bílaleigu Akureyrar námu 5,7 milljörðum króna, en árið 2014 voru þær milljarði minni, eða 4,7 milljarðar.

Fór hagnaðurinn milli ára úr 252 milljónum króna í 335 milljónir. Námu eignir félagsins 10,6 milljörðum króna í árslok 2015 sem er rétt undir skuldunum sem voru rúmir 11 milljarðar.

Til samanburðar nam velta Bílaleigu Akureyrar árið 2010 2,2 milljörðum króna árið 2010 sem þýðir 159% aukningu á fimm árum.