Verðmæti útflutninsframleiðslu sjávarafurða nam á síðasta ári um 220 milljörðum króna og jókst um 10% á milli ára samkvæmt nýrri útgáfu Hagtíðinda Hagstofunnar sem út komu í morgun og eru aðgengileg á vef stofnunarinnar. Þar segir að um sé að ræða samtölu útflutnings og birgðabreytinga. Mælt á föstu verðlagi jókst framleiðslan um 6% á milli ára.
Fluttar voru út sjávarafurðir að verðmæti 220,5 milljarða króna og jókst útflutningurinn á föstu verðlagi um 5,7% en dróst saman að magni um 5,5%. Alls voru flutt út 632 þúsund tonn en árið 2009 voru flutt út 669 þúsund tonn af sjávarafurðum.
Stærstum hluta útflutningsverðmætisins skiluðu frystar sjávarafurðir, um 55%, og jókst hlutdeild þeirra heldur á milli ára. Af einstökum tegundum var það blautverkaður saltfiskur sem vóg mest í útflutningi, um 13%.
Langstærstur hluti útflutnings var til EES-svæðisins, um 73%.
