Ríkissáttasemjari hefur lagt fram málamiðlunartillögu í kjaradeilu ljósmæðra sem samninganefnd stéttarinnar hefur samþykkt. Hækkanirnar sem um var samið eru í grundvallaratriðum þær sömu og í samningi frá 29. maí síðastliðnum og gildistími er 31. mars 2019.
Tillagan felur í sér að sérstökum gerðardómi verði falið að kveða upp úr um það hvort og þá að hvaða leyti álag, menntun og inntak starfsins eigi að hafa frekari áhrif á launasetningu stéttarinnar. Ríkissáttasemjari mun skipa þrjá menn í gerðardóminn, sem fær fullt sjálfstæði í störfum sínum, og fær til 1. september næstkomandi til að ljúka störfum sínum.
Þegar samningsaðilar höfðu fundað fimm sinnum án árangurs var málinu vísað til ríkissáttasemjara, fundurinn í dag var sá fimmtándi þar, en viðskiptablaðið sagði frá stöðu mála í gær . Tillagan verður kynnt félagsmönnum ljósmæðrafélagsins og fjármála- og efnahagsráðherra á næstu dögum og greidd verða um hana atkvæði fyrir hádegi næstkomandi miðvikudag. Þá samþykkir Ljósmæðrafélagið að aflýsa yfirstandandi yfirvinnubanni.
„Það eru ákveðin rök fyrir því sem að sáttasemjari hefur að einhver hluti af ágreiningnum fari fyrir gerðardóm, og báðir aðilar fallast á það að þessu sinni og þá er það partur af heildarlausninni. Ég held að í þessu tilviki hafi það verið mjög skynsamlegt,“ segir Svandís Svavarsdóttir, heilbrigðisráðherra í samtali við Morgunblaðið .
Samkvæmt frétt Morgunblaðsins verður 60 milljónum króna einnig veitt til heilbrigðisstofnana, fyrir utan kjarasamninginn, og er það sama upphæð og ljósmæðrum bauðst í samningnum sem var felldur í júní.
