*

þriðjudagur, 1. desember 2020
Innlent 20. október 2020 09:06

Verslun rýkur upp í þriðju bylgjunni

Ríflega fjórðungsaukning var í verslun milli ára í september. Samdráttur í fataverslun í fyrstu bylgju Covid 19 en aukning nú.

Ritstjórn
Haraldur Guðjónsson

Þó verslun drægist nokkuð saman milli ágúst og september mánaða, er ríflega fjórðungsaukning verslunar í september frá fyrra ári að því er Rannsóknarsetur verslunarinnar hefur tekið saman. Fataverslun sem dróst saman í fyrstu bylgju kórónuveirufaraldursins jókst nú í september um ríflega þriðjung frá fyrra ári.

Líkt og í fyrstu bylgju farsóttarinnar jókst innlend verslun töluvert þegar veiran lét á sér kræla á ný. Á sama tíma og verslun eykst minnkar bæði neysla á þjónustu og neysla erlendis. Íslendingar halda uppteknum hætti í verslun á tímum kórónuveirufaraldursins og jókst verslun um 26,3% milli ára í septembermánuði.

Velta í verslun nam 39,2 milljörðum kr. og dróst lítillega saman milli mánaðana ágúst og september eða um 1,87%, eða 749 milljónir króna. Heildarkortavelta var þá 68,5 milljarðar í mánuðinum og jókst um 9% milli ára. Velta í stórmörkuðum og dagvöruverslunum nam 16,6 milljörðum kr. í mánuðnum sem leið. Velta flokksins jókst um rúmlega 21% milli ára.

Aukin dagvöruverslun með greiðslukortum

Aukin heimavinna auk sóttkvíar á vafalaust þátt í aukningu dagvöruverslunar með greiðslukortum. Á móti má ætla að umsvif mötuneyta vinnustaða sem dæmi hafi dregist saman. Fataverslun jókst um 36% á milli ára í september og rétt tæp 9% frá því í ágúst sl. Í fyrstu bylgju faraldursins í vor, mátti sjá töluverðan samdrátt í fataverslun ólíkt því sem var í síðasta mánuði.

Aðrir flokkar sérvöru hækkuðu einnig frá fyrra ári. Veruleg veltuaukning varð í verslunum með byggingavörur og verslunum með raf- og heimilistæki. Í fyrrnefnda flokknum jókst veltan um 45% milli ára og nam 3,3 milljörðum kr. Í þeim síðarnefnda nam veltan alls 2,6 milljörðum og jókst um tæp 54% milli ára.