Sem kunnugt er þá eru forsvarsmenn Samherja sakaðir um mútugreiðslur til ráðamanna í Namibíu í skiptum fyrir kvóta. Þegar málið kom upp í síðasta mánuði fékk Samherji alþjóðlegu lögmannsstofuna Wikborg Rein til að rannsaka það. Í Þorláksmessubréfi til starfsmanna Samherja, sem Björgólfur Jóhannsson forstjóri sendi í morgun, kemur fram að rannsókninni miði ágætlega.
„Ég veita a
ð
sum ykkar vildu að Samherji svaraði ásökunum á hendur fyrirtækinu af meiri krafti," skrifar Björgólfur. „Ekki velkjast í neinum vafa um að við munum leiðrétta allar rangfærslur um félagið. Við erum bara rétt að byrja. Sem betur fer hefur þetta mál ekki haft teljandi áhrif á reksturinn og það er fyrst og fremst ykkur að þakka. Það er vöxtur
í
sölunni og veiðar og vinnsla ganga vel. Þá hafa samstarfsaðilar okkar hér heima og erlendis staðið með félaginu. Það er baráttuhugur í stjórnendum Samherja á öllum vígstöðvum og við erum sannfærð um að framtíð fyrirtækisins sé björt."
Tugmilljóna tjón í óveðrinu
Í Þorláksmessubréfinu greinir Björgólfur frá því að fjárhagslegt tjón Samherja vegna óveðursins, sem skall á 10. desember, hlaupi á tugum milljóna.
„Rafmagnsleysið í kjölfar veðurofsans varð þess valdandi að öll vinnsla okkar á Dalvík lá niðri í fimm daga og hleypur tjón vegna þess á tugum milljóna króna," segir Björgólfur. „Hins vegar tókst að afstýra tjóni vegna hráefnis og hluti starfsmanna á Dalvík færði sig yfir til Akureyrar þar sem við jukum framleiðsluna tímabundið meðan það var rafmagnslaust á Dalvík.
Blessunarlega varð ekkert tjón á tækjabúnaði og skipum. Vinnsla hófst svo aftur á Dalvík síðastliðinn þriðjudag. Ég vil nota þetta tækifæri til að koma á framfæri þakklæti til viðbragðsaðila fyrir þeirra óeigingjarna starf í kjölfar rafmagnsleysisins. Ég vil jafnframt þakka þeim starfsmönnum, sem færðu sig tímabundið til Akureyrar, alveg sérstaklega fyrir."
Bréf Björgólfs má lesa hér .