Viðar Erlingsson hefur verið ráðinn til að stýra upplýsingatæknisviði og alþjóðlegri verkefnastofu Össurar. Viðar starfaði hjá Marel um árabil og hefur víðtæka stjórnunarreynslu á sviði vöruþróunar, nýsköpunar og vörustjórnunar.
Viðar sat í framkvæmdastjórn Marel frá árinu 2014, sem EVP Innovation & Engineering, og leiddi uppbyggingu nýstofnaðs sviðs alþjóðlegrar nýsköpunar og vöruþróunar. Auk þess var Viðar leiðandi í innleiðingu á tækni og stafrænum lausnum innan fyrirtækisins. Viðar er verkfræðingur frá Háskóla Íslands og með mastersgráðu í Rafmagnsverkfræði frá DTU í Danmörku.
„Ég er mjög spenntur fyrir þeirri metnaðarfullu stafrænu vegferð sem Össur er á og er sannfærður um að hún mun auka skilvirkni og styðja við vöxt fyrirtækisins á næstu árum,“ segir Viðar.
„Með aukinni tækni erum við sífellt að færast nær viðskiptavinunum og notendum á vörunum okkar. Framundan eru því mörg spennandi verkefni ásamt samþættingu nýrra og núverandi kerfa.“
