Heimildir Viðskiptablaðsins herma að viðræður hafi undanfarið staðið yfir milli forsvarsmanna Norðuráls og Rio Tinto um að fyrrnefnda fyrirtækið, það er eigendur þess, muni kaupa álver Rio Tinto í Straumsvík.
Þegar Viðskiptablaðið leitaði viðbragða hjá aðilum voru svör á þá leið að þeir gætu ekki tjáð sig um málið að nokkru leyti. Álverið í Straumsvík hefur verið til sölu en síðasta haust runnu samningaviðræður Rio Tinto og Norsk Hydro út í sandinn á lokametrum þeirra vegna viðbragða evrópskra samkeppnisyfirvalda.
Viðskiptablaðið sagði frá því í sumar að breski hrávörurisinn Glencore sem og þýski álframleiðandinn Trimet Aluminium væru meðal áhugasamra um að kaupa álverið, ásamt mögulega eignum Rio Tinto í Svíþjóð og Hollandi.
Glencore er stærsti hluti Century Aluminum sem er eigandi Norðuráls, með um 13% beinan eignarhlut, en auk álversins á Grundartanga á Century Aluminum tvö álver í Kentucky ríki í Bandaríkjunum og eitt til viðbótar í Suður Karólínu.
