Viðskiptaráð Íslands hefur skilað inn umsögn um sérstakan skatt á fjármálafyrirtæki eða svokallaðan bankaskatt. Þetta kemur fram á heimasíðu ráðsins .
„Viðskiptaráð hefur oft á síðustu misserum vakið athygli á því að bankaskatturinn sé alltof hár, mun hærri en á Norðurlöndunum og beri að lækka allverulega eða afnema. Því er fagnaðarefni að nú skuli lækka skatthlutfall bankaskattsins í skrefum úr 0,376% af skuldum í 0,145% samkvæmt frumvarpinu," segir í umsögninni.
Viðskiptaráð telur jafnframt að ganga ætti lengra og lækka skattinn meira svo hann sé í takt við skattlagningu fjármálafyrirtækja í nágrannalöndunum.
Í umsögninni eru raktar fjórar ástæður fyrir því að lækka skuli bankaskattinn:
- Bankaskattur hækkar útlánavexti og rýrir ávöxtun sparnaðar heimila
- Bankaskattur dregur úr samkeppnishæfni íslensks fjármálamarkaðar og hagkerfis
- Bankaskattur dregur úr samkeppni sem neytendur borga á endanum
- Bankaskattur rýrir ríkiseignir um tugi milljarða króna
Í gær var endurskoðuð fjármálastefna birt og greint var frá því að lækkun bankaskatts verði frestað um eitt ár.