*

fimmtudagur, 28. október 2021
Innlent 10. júní 2021 12:30

Viðskiptaráð vill ekki of sterka krónu

Raungengi krónunnar er að nálgast svipaðar slóðir og fyrir faraldur en Viðskiptaráð telur ekki víst að hagkerfið standi undir mikið sterkari krónu.

Ritstjórn
Svanhildur Hólm Valsdóttir er framkvæmdastjóri Viðskiptaráðs.
Gígja Einars

Viðskiptaráð telur ekki mikla innistæðu fyrir því að hagkerfið ráði við mikið sterkari krónu en áður. Raungengi krónunnar nálgast nú óðfluga sömu slóðir og fyrir faraldur. Þetta kemur fram í greiningu Viðskiptaráðs.

Misvísandi teikn eru á lofti um hvort að hagkerfið geti staðið undir sterkari krónu en fyrir faraldurinn. Í greiningu Viðskiptaráðs er sagt að þróun framleiðni, vaxtamunar, viðskiptakjara og erlendar stöðu sýni ekki skýrt fram á að hagkerfið ráði við sterkari krónu. Þá eru viðskiptakjör lakari og búist er við viðskiptahalla í ár. Einnig er óljóst hvort að gjaldeyrisflæði muni leiða til frekari styrkingar. 

„Þó að það sé eðlilegt að krónan styrkist samhliða bjartari horfum í hagkerfinu er um leið mikilvægt að það gangi ekki of langt til þess eins að gengi krónunnar taki skell seinna. Þetta skiptir máli fyrir kaupmátt heimila, verðstöðugleika, fjárfestingar og stöðugleika í efnahagslífinu almennt. Gengisþróun er mjög væntingadrifin og því geta væntingar um sífellda styrkingu leitt til of mikillar styrkingar sem er aðeins til þess fallin að auka kostnaðarsamar sveiflur," segir í greiningunni. 

Viðskiptaráð telur að gengið einu og hálfu ári fyrir faraldurinn vera í ágætis takti við getu hagkerfisins sem er í ágætu samræmi við sögulegt meðaltal og mat Seðlabankans á jafnvægisraungengi.

„Lykilatriðið er að þeir sem stunda stór sem smá gjaldeyrisviðskipti, þar meðtalinn Seðlabankinn, myndi sér skoðun á því undir hvaða gengi hagkerfið getur staðið. Sé það ekki gert er meiri hætta á öfgafullum gengishreyfingum, t.d. of mikilli styrkingu sem leiðir til þess að gengið fellur með látum síðar. Hagsmunir okkar allra eru að koma í veg fyrir það."

Stikkorð: Viðskiptaráð