Formenn aðildarfélaga Starfsgreinasambands Íslands samþykktu á nýlegum fundi áskorun til stjórnvalda gegn m.a. sjálfboðaliðum. Samkvæmt ályktun félaganna er þess krafist að stjórnvöld grípi til aðgerða vegna þess sem þeir kalla félagsleg undirboð og brotastarfsemi á vinnumarkaði.
Er þar sérstaklega vísað í ferðaþjónustu og byggingariðnað og sagt að jafnvel sé um beina misnotkun á fólki sem kemur hingað til lands til starfa að ræða.
„Aðildarfélög Starfsgreinasambands Íslands hafa orðið vör við þessa þróun ásamt ótal birtingamynda félagslegra undirboða.
Má þar nefna:
- Ólöglega sjálfboðaliðastarfsemi
- Launastuld
- Ófullnægjandi ráðningasamninga
- Misnotkun á vinnandi fólki
- Brot á ákvæðum um hvíldartíma
- Óviðunandi aðbúnað
- Misnotkun í tengslum við útleigu íbúðarhúsnæðis í eigu atvinnurekanda“
Meðal annars vilja formennirnir að eftirlit með vinnustöðum verði samræmt og þétt um land allt, og vísað í aðgerðir stofnana eins og Vinnueftirlitsins, Vinnumálastofnunar, Ríkisskattstjóra, lögreglu auk stéttarfélaga.
Jafnframt vilja þau að launaþjófnaður eins og það er orðað verði sektarskyldur, en í dag geta stéttarfélög einungis gert kröfu um afturvirkar launagreiðslur með dráttarvöxtum ef misbrestur verður á greiðslu launa. Loks segir í ályktuninni að uppræta verði ólögleg sjálfboðaliðastörf auk mansals.
