Lyfjafyrirtækið Alvotech ætlar að fjölga starfsfólki félagsins um hundrað en í dag starfa 330 vísindamenn á Íslandi, Sviss og Þýskalandi. Í tilkynningu frá félaginu segir að störfin sem nú séu auglýst séu miðuð að einstaklingum með háskólamenntun á sviði verkfræði, líf-, raun- og lyfjavísindum.
Alvotech lauk nýlega 36 milljarða króna fjármögnum með erlendum fjárfestum og japanska lyfjafyrirtækið Fuji Pharma gerðist hluthafi í fyrirtækinu með sex milljarða króna fjárfestingu.
Róbert Wessman, stofnandi og stjórnarformaður Alvotech, segir í tilkynningnunni að ánægjulegt sé að sjá hvernig fyrirtækið hafi vaxið og dafnað á stuttum tíma. „Uppbygging fyrirtækisins hefur gengið vel og nú er komið að ákveðnum tímamótum hjá okkur. Í ljósi þess hversu vel hefur gengið í okkar þróunarstarfi og undirbúningi fyrir markaðssetningu lyfja Alvotech þurfum við að styrkja innviði fyrirtækisins enn frekar. Hundrað nýir háskólamenntaðir vísindamenn og sérfræðingar verða ráðnir á þessu ári og það má vel hugsa sér að umsvif okkar og fjárfesting í íslensku efnahagslífi aukist enn frekar á næstu misserum.“
