*

miðvikudagur, 23. október 2019
Innlent 6. september 2019 18:02

Vill 3,7 milljarða í leiguíbúðir

Félagsmálaráðherra vill auka stofnframlögum til að fjölga byggingu leiguíbúða úr 300 í 600 árið 2020.

Ritstjórn
Aukningin er að sögn Ásmundar Einars hluti af umsömdu framlagi stjórnvalda til lífskjarasamninga sem gerðir voru síðasta vor.
Haraldur Guðjónsson

Ásmundur Einar Daði, félags- og barnamálaráðherra, hefur samkvæmt nýju fjárlagafrumvarpi óskað eftir því að fjárframlög til stofnframlaga til byggingar eða kaupa almennra íbúða verði 3,7 milljarðar króna á næsta ári. Þetta kemur fram á vef stjórnarráðsins þar sem segir að áður hafi verið ráðgert að dregið yrði úr fjölgun leiguíbúða í almenna íbúðakerfinu. 

Upphaflega hafi átt að reisa 300 slíkar íbúðir á næsta ári en nú standi til að tvöfalda fjöldann og byggja 600 íbúðir með slíkum stofnframlögum. Aukningin er sögð hluti af umsömdu framlagi til lífskjarasamninganna frá því í vor. 

„Ég hef lagt mikla áherslu á að húsnæðismál séu velferðarmál og því verður mjög ánægjulegt að fylgja þessari uppbyggingu eftir. Þetta er auk þess einn af þeim þáttum sem lagt var upp með í tengslum við lífskjarasamninga á vinnumarkaði og það er ánægjulegt að þeir séu nú byrjaðir að skila sér í aðgerðum,” er haft eftir Ásmundi Einari Daðasyni, félags- og barnamálaráðherra í fréttinni á vef Stjórnarráðsins.