Stofna á félög utan um Kárahnjúkavirkjun sem taki fyri samninga við álverið á Reyðarfirði og skuldir virkjunarinnar í fjörutíu ár. Síðan á að selja félagið, jafnvel útlendingum. Að fjörutíu árum liðnum þarf að stofna nýtt félag utan um Kárahnjúkavirkjun, sem fær afnot af Jöklu í 40 ár og leigir stífluna. Endurtaka þarf leikinn að fjörutíu árum liðnum. Sama máli gegnir um Þjórsárvirkjanir, Rarik, Orkubú Vestfjarða og fleiri virkjanir Landsvirkjunar.

Þetta er hugmynd sem Pétur Blöndal, þingmaður Sjálfstæðisflokksins, varpar fram í Morgunblaðinu í dag. Þar viðrar hann hugmyndir um það hvernig hægt verði að láta Landsvirkjun skila ríkissjóði mörg hundruð milljörðum króna. Á sama tíma og félög eru stofnuð utan um rekstur Landsvirkjunar munu náttúruauðlindir áfram verða í eigu þjóðarinnar, sem muni njóta arðs af henni.

„Ríkissjóður hefði fé til að lækka skuldir, vexti og skatta og koma frosnu atvinnulífi í gang en fjárfesting er í lágmarki, atvinnu skortir og fólk flytur til útlanda. [...] Rekstraráhætta ríkissjóðs hyrfi og flyttist yfir á eigendur hlutafélaganna, K0i, Þ0i og R0i. Nægilega hátt ríkisábyrgðargjald hvetti félögin til að afla lánsfjár annars staðar og ríkisábyrgðin hyrfi og þar með áhætta ríkissjóðs, okkar, af þessum rekstri. Orka fallvatnanna héldist í eigu ríkisins og héldist sem „auðlind í eigu þjóðarinnar“. Virkjanirnar og þar með orkan yrðu seldar,“ skrifar Pétur.