*

laugardagur, 4. júlí 2020
Innlent 2. maí 2018 15:34

Vinna við nýsköpunarstefnu hafin

Heildstæð nýsköpunarstefna fyrir Ísland skal liggja fyrir í síðasta lagi 1. maí 2019 og ná til ársins 2030.

Ritstjórn
Þórdís Kolbrún Reykfjörð Gylfadóttir ráðherra ferðamála, iðnaðar og nýsköpunar.
Þröstur Njálsson

Vinna er hafin að mótun heildstæðrar nýsköpunarstefnu fyrir Ísland en Þórdís Kolbrún Reykfjörð Gylfadóttir, ferðamála, iðnaðar og nýsköpunarráðherra, lagði á síðasta ríkisstjórnarfundi fram tillögu um gerð stefnunnar að því er segir í tilkynningu. Kveðið er á um mótun stefnunnar í stjórnarsáttmála ríkisstjórnarinnar og er hún nú formlega hafin.

Nýsköpunarstefnunni er ætlað að ná til ársins 2030 og hún mun verða unnin í víðtæku samstarfi stjórnvalda, atvinnulífs og vísinda- og menntasamfélags að því er segir í tilkynningunni. Vinnu við gerð stefnunnar á að ljúka í síðasta lagi 1. maí 2019.

„Fjórða iðnbyltingin er hafin og það er fyrirséð að á næstu árum mun stafræn tækni og sjálfvirkni umbylta atvinnugreinum, hagkerfi, velferð og menntun. Í þessu felast ómæld tækifæri til róttækra breytinga, framfara og aukinna lífsgæða. Að sama skapi  geta þær þjóðir sem ekki ná að hagnýta sér þessar breytingar átt á hættu að dragast verulega aftur úr. 

Því er mikilvægt að stefna og aðgerðir stjórnvalda á sviði nýsköpunar stuðli að tækniþróun í sátt við þarfir samfélags og umhverfis. Ísland hefur möguleika á að vera meðal fremstu þjóða í þeirri þróun sem framundan er. Stuttar boðleiðir, hátt menntunarstig, fjarskiptainnviðir og vilji til að takast á við breytingar er góður grunnur fyrir þá vegferð. Á sviði umhverfismála gegnir nýsköpun þýðingarmiklu hlutverki fyrir þau markmið sem sett hafa verið í loftslagsmálum sem og í markmiðum um grænar lausnir. Þá er nýsköpun í opinberri þjónustu, menntamálum og heilbrigðismálum, forsenda bættra lífskjara í heimi tæknibreytinga“ segir ennfremur í tilkynningunni.

Verkefnið mun byggja á starfi fimm faghópa sem fjalla um eftirfarandi málaflokka. 

  1. Nýsköpun í þágu þróunar atvinnulífsins, þ.m.t. matvælaframleiðslu, heilbrigðistækni og menntamála. 
  2. Skipulagning stuðningskerfis nýsköpunar, þ.m.t. styrkjakerfi rannsókna og þróunar og stuðningur við sprotafyrirtæki. 
  3. Nýsköpun í þágu umhverfisvænna lausna, þ.m.t. orku– og loftslagsmála. 
  4. Nýsköpun í opinberum rekstri og einföldun regluverks. 
  5. Nýsköpun í heilbrigðismálum og velferðarþjónustu. 

Sérstök verkefnastjórn mun halda utan um stefnumótunarvinnuna og verður hún skipuð verkefnisstjórum verkefnanna fimm, auk formanns verkefnisstjórnar sem ráðherra nýsköpunarmála skipar.