Þrátt fyrir óbreytta gulleign Seðlabanka Íslands að magni til jókst virði hennar um 3,7 milljarða króna í samræmi við 31% hækkun á árslokagengi gullverðs. Virði gulleignar Seðlabankans nam 15,4 milljörðum króna í lok árs 2020, samanborið við 11,7 milljarða króna árið áður, að því er kemur fram í ársskýrslu bankans. Seðlabankinn á 64 þúsund únsur af gulli sem jafngildir um 1,9% af gjaldeyrisforða bankans.

Þetta er annað árið í röð sem gengisendurmat á gulli leiðir til mikillar aukningar á virði gulleignar Seðlabankans. Árið 2019 var leiddi gengisendurmat til þess að virði gulleignar Seðlabankans var færð upp um 2,2 milljarða króna.

Gullverð hækkaði töluvert á síðasta ári, m.a. vegna áhyggja fjárfesta af áhrifum kórónuveirunnar og lækkandi ávöxtunarkröfu ríkisskuldabréfa. Í byrjun ágúst 2020 fór gullverð yfir 2.000 dali í fyrsta sinn en stendur í 1.755 dölum í dag.