Höskuldur Ásgeirsson forstjóri Flugstöðvar Leifs Eiríkssonar hefur sent frá sér yfirlýsingu vegna kæru Samtaka verslunar og þjónustu (SVÞ) til ESA, eftirlitsstofnun EFTA, vegna reksturs verslunar fyrir komufarþega í Flugstöð Leifs Eiríkssonar. Höskuldur vísar forsendum kærunnar á bug í yfirlýsingu í sjö liðum.

Höskuldur segir rétt að ítreka eftirfarandi í tilefni yfirlýsingar SÞV um málið frá 17. júlí 2006:

1. Rekstur verslunar og þjónustu í flugstöðinni er í samræmi við lög frá Alþingi og reglur sem stjórnvöld setja hverju sinni.

2. Komuverslunin í flugstöðinni keppir fyrst og fremst við fríhafnarverslun í öðrum löndum og er til hagræðis og öryggis fyrir farþega og flugrekendur. Rök og reynsla hníga að því að dæmigerðar fríhafnarvörur á borð við áfengi, ilmvatn og sælgæti yrðu keyptar erlendis og fluttar hingað til lands ef komuverslun í flugstöðinni yrði lögð af. Í Noregi voru nýlega sett lög sem heimiluðu fríhafnarverslun fyrir komufarþega á alþjóðlegum flugvöllum og í kjölfarið var fyrsta komuverslunin opnuð á Gardermoen-flugvelli við Osló. Þannig vildu Norðmenn færa fríhafnarverslunina heim. Farþegarnir glöddust yfir breytingunni en verslunarrekendur á flugvöllum grannlanda Noregs hins vegar ekki, einfaldlega af því þeir misstu spón úr aski sínum!

3. Komufarþegar hafa takmarkaða heimild til að kaupa vörur án aðflutningjalda og virðisaukaskatts, hámarksupphæðin nú er 46.000 krónur. Ef farþegi hefur ekki tök á að nýta sér þessa heimild við komuna til landsins er næsta víst að mestur hluti slíkra viðskipta ætti sér stað erlendis og störfum við verslun í flugstöðinni fækkaði þá að sama skapi. Það á ekki að skipta máli hvar ferðamaðurinn nýtir sér heimildina svo framarlega að það sé gert fyrir tollafgreiðslu við heimkomu.

4. Í málflutningi SVÞ er greinilega ruglað saman almennri heimild ferðamanns til að kaupa tollfrjálsar vörur annars vegar og rekstrarfyrirkomulagi komuverslunar fríhafnarinnar hins vegar, sem eru tvö algjörlega aðskilin málefni.

5. Markvisst er unnið að því að auka og efla verslunarrekstur einkafyrirtækja í flugstöðinni eins og sannast best þessa dagana. Nýjar og glæsilegar verslanir hafa verið opnaðar og fleiri bætast við á næstu dögum og mánuðum.

6. Stórfelldar framkvæmdir eiga sér stað við stækkun og breytingar í flugstöðinni og kostnaður við þær hleypur á milljörðum króna. Tekjum af fríhafnarverslun í flugstöðinni er ætlað að standa undir þessum kostnaði en ef sú verslun verður aflögð í núverandi mynd verður að hækka verulega þjónustugjöld á flugrekendur og farþega.

7. Verði fríhafnarreksturinn boðinn út er líklegt að sérhæfð erlend verslunarfélög standi sterkast að vígi í krafti stærðar sinnar og reynslu af sambærilegri starfsemi á erlendum flugvöllum.

Undir þetta skrifar Höskuldur Ásgeirsson.