Fyrir viðskiptanefnd Alþingis liggur frumvarp um stofnun Bankasýslu ríkisins, en henni er ætlað að fara með eignarhluti ríkisins í fjármálafyrirtækjum.
Í fréttabréfi Viðskiptaráðs segir að ljóst sé að leysa þurfi úr þeim fjölmörgu álitamálum sem sköpuðust við yfirtöku ríkisins á viðskiptabönkunum. Mikilvægt sé þó að faglega sé staðið að þeirri úrlausn og að aðkoma ríkisins sé hafin yfir allan vafa og um hana settar ákveðnar leikreglur.
Vegna þessa fellst Viðskiptaráð í megindráttum á þessar fyrirætlanir stjórnvalda, þ.e. um stofnun Bankasýslu ríkisins, en þrátt fyrir það gerði ráðið talsverðar athugsemdir við frumvarpið.
Viðskiptaráð segir að það skjóti skökku við að stjórnvöld hyggjast setja þessi verkefni í opinbera stofnun, en ekki félag. Það gangi þvert gegn ráðleggingum um nefndar um endurreisn fjármálakerfisins, en í fyrstu starfsáætlun hennar er beinlínis lagt til að ríkisstjórnin íhugi að stofna „sjálfstætt félag, með viðeigandi aðskilnaði frá hinu pólitíska valdi, er fari með eignarhlut ríkisins í bönkunum…”.
Þá segir Viðskiptaráð það jafnframt vekja spurningar að hvergi sé að finna samanburð á því hvernig sambærilegum málum hefur verið háttað í öðrum löndum, en í fyrrgreindri áætlun nefndarinnar segir að með stofnun sjálfstæðs móðurfélags væri ríkisstjórnin að fara að dæmi „yfirvalda í mörgum löndum”.
Til viðbótar við ofangreint gerði Viðskiptaráð margvíslegar athugsemdir við einstök ákvæði frumvarpsins, en þar má helst nefna: Að gera þurfi mun ríkari kröfur um upplýsingagjöf en frumvarpið felur í sér; að fjármálaráðherra sé einum ætlað að skipa í stjórn stofnunarinnar; að hvergi sé fjallað um starfshætti stofnunarinnar séu aðrir hluthafar í viðkomandi félögum; að ekki skuli vera nægjanlega mikið litið til sölu fyrirtækjanna í gegnum Kauphöll Íslands og að of lítil áhersla sé lögð á sölu um leið og markaðsaðstæður leyfa.
Umsögn Viðskiptaráðs við frumvarpið má nálgast hér .
