*

miðvikudagur, 28. október 2020
Erlent 25. maí 2020 13:03

Volkswagen dæmt að greiða bætur

Volkswagen hefur enn og aftur verið dæmt að greiða bætur vegna hugbúnaðar í dísilvélum framleiðandans frá 2007-15.

Ritstjórn

Hæstiréttur Þýskalands kvað í morgun um að Volkswagen þurfi að greiða bætur til ökumanns sem hafði keypt bíl frá fyrirtækinu með hugbúnað sem svindlar á útblástursprófunum. Stefnandinn Herbert Gilbert fær endurgreiðslu fyrir ökutækið en afskriftir eru teknar með í útreikninginn. BBC greinir frá. 

Úrskurðurinn setur fordæmi fyrir um 60 þúsund annarra mála í þýska dómskerfinu. Volkswagen hafði þegar greitt sáttagreiðslur upp á 830 milljónir evra vegna aðskilinnar hóplögsóknar sem innihélt 235 þúsund þýskra bílaeigenda. 

Bílaframleiðandinn hefur nú greitt samanlagt meira en 30 milljarða evra í sektir, bætur og endurkaup víðs vegar um heiminn frá því að málið kom fyrst upp árið 2015. 

Volkswagen hafði sett hugbúnað í dísilbíla sína, sem gerði þeim kleift að svindla á útblástursprófunum á árunum 2007-2015. Fyrirtækið hefur gefið það út að um 11 milljónir bíla innihéldu hugbúnaðinn sem varaði vél bílsins við prófunum. 

Stikkorð: Volkswagen