Bandaríska netfyrirtækið Yahoo tapaði 440 milljónum dala á öðrum ársfjórðungi ársins, og áfram bólar ekkert á að fyrirtækinu takist að selja leitar- og auglýsingastarfssemi sína.
Tilkynnti fyrirtækið um 60 milljón Bandaríkjadala tekjuaukningu á ársfjórðungnum sem komu helst til vegna kjarnastarfsemi hennar, þó einnig hafi símþjónustutekjurnar aukist úr 252 milljón dölum í 378 milljón dali.
Fyrrum netrisar til sölu
Framtíð Yahoo hefur verið ótrygg í þónokkur ár, en miklar vangaveltur hafa verið um hvort takist að selja fyrirtækið eða hluta af því.
Eru þær væntingar hluta til byggðar á hvað Verizon, símafyrirtækið geri, en það keypti nýlega AOL, sem líkt og Yahoo var áður einnig risi á netmörkuðum.
Fækkaði starfsfólki um 15%
Hafa verðhugmyndir rokkað frá 5 uppí 8 milljarða Bandaríkjadala. Hækkuðu hlutabréf í fyrirtækinu um 0,6% í 37,95 dali hlutinn, sem færir andvirði fyrirtækisins upp í 35,8 milljarða dala. En stór hluti af því verðmæti er vegna hlutar Yahoo í netversluninni Alibaba.
Áfram liggur verkefni fyrirtækisins fyrst og fremst í því að reyna að auka tekjur og draga úr kostnaði, en í febrúar fækkaði það starfsfólki sínu um 15%. Jafnframt vöknuðu áhyggjur í síðustu viku á því hve verðmæt einkaleyfi fyrirtækisins væru.
