Vörukarfa ASÍ hækkaði mest í Bónus, um 2,7% á milli verðmælinga verðlagseftirlits ASÍ í annarri og þriðju viku júní (vika 24 og 25).
Karfan hækkaði um 1,9% í verslun Krónunnar á milli vikna og um 2% í klukkubúðinni Samkaupum-Strax.
Þetta kemur fram í tilkynningu frá ASÍ og eru nýjustu niðurstöður úr könnunum verðlagseftirlitsins sem fylgist með verði í matvöruverslunarkeðjum í hverri viku og skoðar breytingar á verið almennrar innkaupakörfu fyrir fjölskyldu.
Þar kemur fram að verð vörukörfunnar hækkaði í öllum lágvöruverðsverslunum að Kaskó undanskilinni þar sem verðið var nánast óbreytt á milli vikna.
2,7% verðhækkun á körfunni í Bónus er tilkomin vegna hækkana á kjötvörum í körfunni en aðrir liðir hækka einnig og hafa grænmeti og drykkjarvörur þar mest áhrif til hækkunar að því er fram kemur hjá ASÍ.
Þá segir ASÍ að tæplega 2% hækkun á vörukörfunni í Krónunni megi einnig rekja að mestu til hækkana á kjötvörum en einnig að nokkru til hækkana á drykkjarvörum.
Vörukarfan hækkaði um rúmlega 1% í Nettó á milli vikna sem orsakast af hækkunum á kjötvörum, drykkjarvörum og hreinlætisvörum í körfunni, að sögn ASÍ.
Í stórmörkuðunum hækkaði vörukarfa ASÍ um 0,8% í Nóatúni og um 0,5% í Hagkaupum á milli mælinga í 24. og 25. viku en lækkaði í Samkaupum-Úrval um 1,5%.
„Lækkunin stafar að mestu af lækkun á kjötvörum í körfunni en á móti vegur talsverð hækkun á hreinlætis- og snyrtivörum. Í klukkubúðunum var lítil breyting á verði körfunnar í 10-11 og 11-11 á milli vikna en karfan hækkað um 2% í Samkaupum-Strax sem rekja má til hækkunar á kjötvörum,“ segir í skýrslu ASÍ.
