Fyrstu átta mánuðina 2009 voru fluttar út vörur fyrir 297,6 milljarða króna en inn fyrir 252,9 milljarða króna fob (276,6 milljarða króna cif). Afgangur var því á vöruskiptunum við útlönd, reiknað á fob verðmæti, sem nam 44,7 milljörðum en á sama tíma árið áður voru þau óhagstæð um 76,1 milljarð á sama gengi¹. Vöruskiptajöfnuðurinn var því 120,8 milljörðum króna hagstæðari en á sama tíma árið áður. Tölur fyrri mánaða um innflutning á hrá- og rekstrarvörum hafa verið leiðréttar til hækkunar um 7,9 milljarða.
Útflutningur
Fyrstu átta mánuði ársins 2009 var verðmæti vöruútflutnings 104,4 milljörðum eða 26,0% minna á föstu gengi¹ en á sama tíma árið áður. Sjávarafurðir voru 44,6% alls útflutnings og var verðmæti þeirra 10% minna en á sama tíma árið áður. Útfluttar iðnaðarvörur voru 49,4% alls útflutnings og var verðmæti þeirra 28,8% minna en á sama tíma árið áður. Mestur samdráttur varð í verðmæti útflutnings iðnaðarvara, aðallega áls, en einnig var samdráttur í útflutningi á skipum og flugvélum og á sjávarafurðum.
Innflutningur
Fyrstu átta mánuði ársins 2009 var verðmæti vöruinnflutnings 225,1 milljarði eða 47,1% minna á föstu gengi¹ en á sama tíma árið áður. Samdráttur varð í innflutningi nær allra liða innflutnings, mest í hrá- og rekstrarvöru, flutningatækjum og fjárfestingavöru.
