Björn Sigurðsson, framkvæmdastjóri Senu, segir tölvuleikjabransann vera mjög heilbrigðan, vaxandi og gríðarlega sterkan. „Á heimsvísu eru tölvuleikir að taka rosalegt stökk og var t.d. salan á tölvuleiknum Call of duty: Modern Warfare 3 að slá met sem stærsti viðburður í afþreyingu þegar leikurinn var kynntur á dögunum. Það er meira en nokkur bíómynd eða tónlistarmaður geta státað af. Þetta er svakalega spennandi bransi með mikla veltu en lægri framlegð en í öðrum deildum Senu.“
Tölvuleikjaútgáfurnar eru dreifðar yfir árið en það ríkir mikil samkeppni um verð á þessum markaði. Sena sér um dreifingu til flestra smásöluaðila hér á landi. „Menn hafa kosið að versla við okkur. Við veitum þjónustu og markaðsstuðning, sjáum um dreifingu, og hjálpum til við losun birgða ef menn lenda í vandræðum. Smásalarnir sækja mikla þjónustu hingað, svo ég tali nú ekki um vöruþekkingu. Vöruþekking er algerlega lykilatriðið í þessu, og það gildir um hvaða iðnað sem er. Innan afþreyingarinnar skiptir vöruþekkingin alveg svakalega miklu máli.“
Viðtal við Björn má lesa í heild sinni í nýjasta tölublaði Viðskiptablaðsins.
