Í nýliðnum júlí var vöruútflutningur í greiðslujöfnuði áætlaður 52,2 milljarðar en vöruinnflutningur í greiðslujöfnuði áætlaður 71,1 milljarður. Vöruviðskiptajöfnuður í greiðslujöfnuði var því áætlaður neikvæður um 18,9 milljarða. Þetta kemur fram í nýjum tölum Hagstofu Íslands.

Í sama mánuði var þjónustujöfnuður áætlaður jákvæður um 42,8 milljarða en útflutt þjónusta var áætluð 82,4 milljarðar á meðan innflutt þjónusta var áætluð 39,5 milljarðar.

„Í júlí 2019 var því áætlað verðmæti útflutnings vöru- og þjónustuviðskipta 134,6 milljarða en áætlað verðmæti innflutnings vöru- og þjónustuviðskipta var 110,6 milljarðar. Vöru og þjónustujöfnuður var því áætlaður jákvæður um 24 milljarða í júlí 2019.

Á fyrstu sjö mánuðum ársins var verðmæti útflutnings vöru- og þjónustuviðskipta áætlað 772,3 milljarðar samanborið við 731,8 milljarða árið áður. Verðmæti innflutnings fyrir sama tímabil var áætlað 706 milljarðar samanborið við 695,8 á sama tímabili 2018. Uppsafnaður vöru- og þjónustujöfnuður fyrstu sjö mánuði ársins 2019 var því áætlaður jákvæður um 66,3 milljarða samabanborið við 36 milljarða fyrir sama tímabil á síðasta ári.“