Stjórn VR hefur ákveðið að láta verða af stofnun leigufélags sem sagt er að verði ekki rekið í hagnaðarskyni, að því er segir á vef félagsins. Eins og Viðskiptablaðið hefur greint frá hefur Ragnar Þór Ingólfsson formaður félagsins viðrað hugmyndir um stofnun leigufélags, og hafði trúnaðarráð félagsins jafnframt hvatt til stofnunar félagsins.
Verður nánari útfærsla á framkvæmdum, úthluturnarreglum, leiguverði og þess háttar í höndum Húsnæðisnefndar VR, en í yfirlýsingu félagsins segir að öfugt við almenn leigufélög muni leigufélag VR snúast fyrst og fremst um það hvernig hægt sé að hafa leiguna sem lægsta en ekki sem mesta arðsemi.
„Áætluð uppsöfnuð þörf á nýjum íbúðum á íslenskum markaði eru 6.000 íbúðir og árleg þörf nýrra íbúða eru 2.200 íbúðir svo augljóst má vera að um neyðarástand er að ræða,“ segir í yfirlýsingunni, en Íbúðalánasjóður hefur talað um að þörfin sé allt að 17 þúsund íbúðir.
„Stjórn VR telur það félagslega skyldu sína að bregðast við með einhverjum hætti og leggja þannig eitthvað á vogarskálarnar í þeirri von að slíkt viðbragð verði opinberum aðilum, öðrum félögum, samtökum og sjóðum fyrirmynd og hvatning til að gera eitthvað viðlíka eða koma til samstarfs við VR um frekari verkefni.“
Hér má lesa frekari fréttir um málefni tengd nýjum formanni VR:
- 4. febrúar 2018 - VR undirbýr stofnun leigufélags
- 29. janúar 2018 - Framboðið til höfuðs Gylfa í ASÍ
- 13. desember 2017 - Ragnar segist gjörsamlega misboðið
- 27. nóvember 2017 - Ágúst svarar Ragnari Þór
- 29. ágúst 2017 - Segir launafólk alið á uppgjöf
- 12. apríl 2017 - Ragnar Þór: Ástæða til að endurskoða kerfið
- 14. mars 2017 - Ragnar Þór nýr formaður VR
- 10. febrúar 2017 - Ragnar Þór fer fram gegn Ólafíu
Hér má lesa skoðanapistla um nýjan formann VR:
- 9. febrúar 2018 - Íbúðaævintýri Ragnars Þórs
- 9. september 2017 - Ragnar Þór í Sósíalistaflokkinn?
- 9. apríl 2017 - Risaeðla Ragnars Þórs
- 16. mars 2017 - Átakamaður í formannsstól