Fulltrúar VR afhentu Héraðsdómi Reykjavíkur stefnu á hendur Fjármálaeftirlitinu í dag. Frá þessu er greint á vef Morgunblaðsins.
Stjórn VR samþykkti að stefna stofnuninni fyrir að viðurkenna ekki lögmæti ákvörðun fulltrúaráðs VR um að afturkalla umboð stjórnarmanna í Lífeyrissjóði verzlunarmanna.
„Markmiðið er fyrst og fremst að fá þennan úrskurð FME dæmdan ógildan,“ segir Ragnar Þór í samtali við Morgunblaðið og vísar til þess að FME lítur svo á að ákvörðun um afturköllunina sé ekki gild þar sem hún hafi ekki verið tekin af stjórn VR eins og samþykktir Lífeyrissjóðs verzlunarmanna gera ráð fyrir.
Fulltrúaráð VR ákvað 20. júní að afturkalla umboð stjórnarmanna sem félagið tilnefnir í stjórn lífeyrissjóðsins.