Íslenska flugfélagið Wow air ætlar að hefja áætlunarflug til kanadísku borganna Toronto og Montréal í maí á næsta ári. Þetta kemur fram í frétt danska miðilsins Check-in sem Túristi greinir frá.

Samkvæmt fréttinni mun Wow air hefja flug til Montréal þann 12. maí á næsta ári, eða viku áður en Icelandair fer jómfrúarferð sína til borgarinnar. Bæði félög munu fljúga fjórum sinnum í viku til Montréal.

Þá kemur fram að flugfélagið ætli einnig að veita Icelandair samkeppni í flugi milli Toronto og Keflavíkur. Þannig muni Wow air hefja flug þangað 19. maí næstkomandi og fljúga þangað fjórum sinnum í viku.