Fyrsta flug til St. Louis var í gær en þetta er í fyrsta sinn sem Íslendingum býðst beint flug til borgarinnar. Flogið verður þangað fjórum sinnum í viku, á mánudögum, þriðjudögum, fimmtudögum og laugardögum í Airbus A321 vél flugfélagsins. Flugtíminn er rétt rúmar sjö klukkustundir en lent er í St. Louis klukkan 19:50 að staðartíma.
„Við höfum fundið fyrir miklum áhuga fyrir þessari flugleið frá almenningi í St. Louis. Við erum vel í stakk búin að taka á móti gestum víðs vegar að til þess að upplífa allt sem borgin hefur upp á að bjóða,“ sagði Rhonda Hamm-Niebruegge framkvæmdastjóri St. Louis Lambert International flugvallar.
St. Louis tilheyrir Missouri og liggur meðfram Mississippi ánni. St. Louis er tólfti áfangastaður WOW air í Bandaríkjunum en þeir verða samtals 13 í lok maí. Stutt er síðan áfangastaðirnir Detroit, Cleveland og Cincinnati bættust við ört stækkandi leiðarkerfi WOW air.
