Yahoo skilaði uppgjöri fyrir fjórða ársfjórðung síðasta árs eftir lokun markaða í gær. Félagið skilaði miklu tapi, eða sem nemur 4,5 milljörðum dala, eða 585 milljörðum króna. Mikill hluti tapsins kemur til vegna niðurfærslu á eignum fyrirtækisins, s.s. Tumblr blogg síðunni.

Í tilkynningu frá fyrirtækinu sagði að það væri að skoða leiðir til að endurskipuleggja reksturinn. Meðal þess sem fyrirtækið er að skoða er að segja upp 15% af starfsfólki fyrirtækisins í endurskipulagningunni.

Einnig er talið líklegt að félagið muni reyna að selja kjarnarekstur félagsins, þ.e. þá deild fyrirtæksins sem tengist vefnum. Um það bil milljarður manna nýtir sér þjónustu Yahoo í hverjum mánuði og fyrirtækið því væntanlegt skotmark fyrir fjarskiptafyrirtæki sem vilja auka við markaðshlutdeild sína. Talið er að kjarnarekstur Yahoo verði metinn á um það bil 3,4 milljarða dala, eða 442 milljarða króna. Auk þess á félagið vænan eignarhlut í Alibaba Group Holding Ltd. og Yahoo Japan sem eru mikils virði.

Kostnaður fyrirtækisins hefur hækkað jafnt og þétt síðustu þrjú ár síðan núverandi forstjóri félagsins, Marissa Mayer tók við. Á sama tíma hafa tekjur fyrirtækisins lækkað. Hún tók við með það að markmiði að snúa við rekstri félagsins, sem var þegar í vandræðum.