*

fimmtudagur, 21. janúar 2021
Innlent 1. desember 2020 10:10

Yfirdeild staðfestir brot Íslands

Yfirdeild Mannréttindadómstóls Evrópu hefur staðfest brot íslenska ríkisins í Landsréttarmálinu.

Jóhann Óli Eiðsson
Haraldur Guðjónsson

Yfirdeild Mannréttindadómstóls Evrópu hefur staðfest brot íslenska ríkisins í Landsréttarmálinu. Frá þessu er greint á vef Fréttablaðsins og sagt að niðurstaðan hafi verið einróma. Dómurinn hefur enn ekki verið birtur.

Í málinu var deilt um það hvort skipan Landsréttar á einu bretti hafi brotið gegn ákvæði Mannréttindasáttmála Evrópu um að dómstól sé komið á fót með lögum eða í samræmi við lög. MDE hafði áður komist að þeirri niðurstöðu, það var í mars í fyrra, að svo hefði ekki verið en ríkið fór þess á leit að yfirdeild MDE tæki málið fyrir.

Yfirdeildin skoðar alla jafna aðeins mál sem geta haft talsverð áhrif út á við og féllst hún á það. Málflutningur fór fram í byrjun febrúar á þessu ári og er dómur væntanlegur í dag, á sjálfan fullveldisdaginn.

Þegar Landsrétti var komið á fót ákvað þáverandi dómsmálaráðherra, Sigríður Á. Andersen, að víkja frá mati dómnefndar um hæfni dómaraefna í fjórum tilfellum. Áður hafði Hæstiréttur komist að þeirri niðurstöðu að við þann gjörning hefðu meginreglur stjórnsýsluréttarins verið brotnar.

Umræddir fjórir dómarar tóku til starfa við réttinn en í málinu nú er deilt um það hvort seta eins þeirra í dóminum hafi brotið gegn rétti einstaklings til réttlátrar málsmeðferðar fyrir dómi. Um var að ræða játningarmál vegna smávægilegra afbrota. MDE taldi að svo hefði verið.

Dómararnir fjórir sinntu ekki dómstörfum eftir að dómur MDE lá fyrir og voru dómarar settir til starfans. Nú er staðan sú að þrír af fjórum dómurum hafa hlotið skipun í embætti á nýjan leik og því aðeins einn þeirra, Jón Finnbjörnsson, sem ekki sinnir störfum við dóminn.

Nánar verður fjallað um efni dómsins á Viðskiptablaðinu síðar í dag.