Viðskiptablaðið fjallaði í dag um gögn úr húsleitum sérstaks saksóknara í Banque Havilland í Lúxemborg en blaðið er með undir höndum málssjöl frá dómstólum í Lúxemborg vegna málsins.
Fram kom að margir helstu stjórnenda, eigenda og viðskiptavina Kaupþings höfðu mótmælt því fyrir dómsstólum í Lúxemborg að gögnin yrðu afhent sérstökum saksóknara.
Líkt og sést á þessu málsskjali var Ólafur einn þeirra sem mótmælti afhendingu gagnanna. Hægt er að stækka myndina með því að tvísmella á hana.
Meðal þeirra sem mótmæltu var Ólafur Ólafsson og fjögur félög í hans eigu. Í tilefni af umfjöllum Viðskiptablaðsins, og í kjölfarið annarra fjölmiðla, um haldlagningu gagnanna hefur Ólafur sent frá sér eftirfarandi yfirlýsingu:
„ 1. Undirritaður gerði engar athugasemdir við það að gögn, sem sérstakur saksóknari fór fram á og tengdust umræddri rannsókn, yrðu afhent.
2. Í engu var mótmælt að gögn þeirra fyrirtækja sem komu að þeim viðskiptum sem til rannsóknar eru, sem og persónuleg gögn í Kaupþingi, yrðu afhent.
3. Mótmælt var að gögn, sem í engu tengdust umræddum viðskiptum og gögn fyrirtækja sem ekki voru lengur í minni persónulegu eigu og tengdust ekki þessum viðskiptum, yrðu afhent.
4. Húsrannsóknir eru eðlilegur hluti af rannsóknarferli yfirvalda. Jafn sjálfsagt á að vera að slíkum húsrannsóknum sé markaður skýr og sanngjarn rammi.
Virðingarfyllst,
Ólafur Ólafsson“