Nýjasta bók spennusagnahöfundarins Yrsu Sigurðardóttur,
Brakið
, er í efsta sæti á metsölulista Rannsóknarseturs verslunarinnar fyrir dagana 18. desember til 24. desember. Þá er bókin jafnframt mest selda bókin á Íslandi á þessu ári.
Þetta er þriðja vikan í röð sem Brakið er mest selda bókin en í þar síðustu viku velti hún
Einvíginu
eftir Arnald Indriðason úr sessi. Einvígið hafði þá verið mest selda bókin í þrjár vikur á undan. Einvígið var þó í öðru sæti listans í sömu viku og er jafnframt í öðru sæti yfir mest seldu bækur á árinu.
Listinn er nú tekinn saman vikulega og birtur á vef Rannsóknarsetursins.
Í þriðja sæti listans var bókin
Gamlinginn sem skreið út um gluggann og hvarf
eftir sænska rithöfundinn Jonas Jonasson. Hún hefur verið á topp 10 listanum lengi og var lengi vel mesta selda bókin það sem af var ári, en er nú komin í þriðja sætið á eftir Brakinu og Einvíginu.
Í fjórða sæti metsölulistans síðustu vikuna fyrir jól, og jafnframt ný á topp 10 listanum, var bókin
Málverið
eftir Ólaf Jóhann Ólafsson. Sú bók er jafnframt sjötta mest selda bókin á árinu.
Þá voru
Heilsuréttir Hagkaups
, eftir Sólveigu Eiríksdóttur, í fimmta sæti og bókin
Útkall – ofviðri í Ljósufjöllum
eftir Óttar Sveinsson í sjötta sæti síðustu vikuna fyrir jól.
Mest seldu bækurnar á árinu
Sem fyrr segir er Brakið nú mest selda bókin á árinu en það er í fyrsta sinn á þessu ári. Einvígið, sem nú er í öðru sæti yfir mestu seldu bækurnar á árinu, var í efsta sæti í síðustu viku og hafði þá ýtt Gamlingjanum sem skreið út um gluggann úr sessi.
Í fjórða sæti listans yfir mest seldu bækurnar á árinu eru Heilsuréttir Hagkaups og í fimmta sæti er
Stóra Disney köku- og brauðbókin
.
Rétt er að taka fram að þangað til í síðustu vikunni fyrir jól var Yrsa Sigurðardóttir með tvær bækur á topp 10 listanum yfir mest seldu bækurnar á árinu þar sem metsölubók hennar síðan í fyrra,
Ég man þig
, var á listanum.