Mark Zuckerberg, stofnandi og forstjóri Facebook, er staddur hér á landi sem stendur samkvæmt heimildum Viðskiptablaðsins, með eiginkonu sinni, Priscilla Chan. Meðal annars sást til þeirra á gangi í miðborg Reykjavíkur í dag.

Hjónin hafa verið á ferðalagi um Evrópu að undanförnu að halda upp á sjö ára brúðkaupsafmæli sitt. Þau voru í París fyrr í vikunni þar sem Zuckerberg fundaði með Emmanuel Macron, forseta Frakklands. Chang og Zuckerberg fóru einnig til Aþenu í Grikklandi og skoðuðu Pantheon. Zuckerberg hefur áður haft viðkomu á Íslandi á leið sinni yfir Atlantshafið.

Chan og Zuckerberg giftu sig 19. maí 2012, degi eftir að Facebook var skráð á markað. Þá var markaðsvirði félagsins ríflega 100 milljarða dollara. Síðan þá hefur markaðsvirði félagsins fimmfaldast og er sem stendur 532 milljarðar dollara

Þau kynntust í Harvard árið 2003. Chan er menntaður læknir en hefur einna helst beitt sér á sviði góðgerðamála undanfarin ár. Hjónin hafa gefið út að þau muni gefa 99% af auði sínum til góðgerðamála.