*

fimmtudagur, 14. nóvember 2019
Innlent 27. september 2019 19:00

Hagnaður AB 117 milljónir

Félagið AB varahlutir ehf. skilaði hagnaði upp á 117 milljónir króna fyrir rekstrarárið 2018, það er 10% lækkun milli ára.

Ritstjórn
Félagið AB varahlutir ehf. flytur inn og selur varahluti fyrir bifreiðar.
Haraldur Jónasson

Félagið AB varahlutir ehf. sem flytur inn og selur varahluti fyrir bifreiðar og önnur vélknúin tæki skilaði hagnaði fyrir rekstrarárið 2018 upp á 117 milljónir króna. Það er 10% lækkun á milli ára en félagið skilaði 130 milljón króna hagnaði árið 2017.

Rekstrartekjur félagsins breyttust ekki á milli ára en stóð í 836 milljónum króna í lok árs 2018. Rekstrargjöld félagsins hækkuðu hins vegar úr 670 milljónum króna í 688 milljónir eða um 2,6%.

Eignir félagsins hækkuðu milli ára úr 402 milljónum upp í 515 milljónir króna í lok árs 2018 eða um rúmlega 50%. Aukning félagsins á tengda aðila skýrir hækkunina að miklu leiti en þær jukust um 50% milli ára úr 172 milljónum króna í 257 milljónir. Einnig hækkuðu vörubirgðir félagsins úr 141 milljón í 168 milljónir.

Skuldir félagsins drógust lítillega saman milli ára, úr 132 milljónum í 128 eða um 3,1%. Á sama tíma jókst eigið fé úr 271 milljón í 388 eða um 43,2%. Því stendur eiginfjárhlutfall félagsins í rúmlega 75%.

Framkvæmdarstjóri félagsins er Loftur Guðni Matthíasson en eigandi þess er Kostgæfni ehf. sem á 100% hlut. Stjórn félagsins tekur ákvörðun um arðgreiðslu á aðalfundi félagsins. Starfsmenn félagsins eru 24.