*

miðvikudagur, 27. október 2021
Týr
25. júlí 2021 13:55

Kaldar kveðjur frá Bjarna

Engar breytingar hafa verið gerðar á áfengislöggjöfinni í tíð Bjarna Ben. og það virðist sem meginmarkmið hans sé að halda embættismönnum ríkisins ánægðum.

Eyþór Árnason

Það þyrfti meira pláss en rúmast í þessum dálki til að rifja upp þær breytingar sem hafa verið boðaðar á áfengislöggjöfinni á liðnum árum en aldrei gengið eftir. Þar er bara við stjórnmálin að sakast. Þó að boðbera frelsisins sé ekki að finna á meðal stjórnmálamanna eru þó sem betur fer aðilar sem taka það verkefni að sér. Arnar Sigurðsson, eigandi  Sante, er einn þeirra og hann hefur sett á fót franska vefverslun sem afhendir vörur sínar hér á landi. Það er í samræmi við þau furðulegu lög sem hér gilda.

* * *

Eins og fjallað hefur verið um í fjölmiðlum hefur Áfengis- og tóbaksverslun ríkisins (ÁTVR) kært Sante, ekki fyrir brot á áfengislöggjöfinni heldur fyrir að hafa svikist undan því að greiða virðisaukaskatt - sem er á gjalddaga eftir tvær vikur. Mögulega verður forstjóri ÁTVR einn af handritshöfundum Skaupsins í ár.

* * *

Hér hafði Bjarni Benediktsson, fjármálaráðherra og formaður Sjálfstæðisflokksins, sem alla jafna vill kenna sig við frjálslyndi, kjörið tækifæri til að styðja við frjálslynda frumkvöðlastarfsemi og slá á puttana á ofríkistilburðum ríkisvaldsins. Í samtali við mbl.is í vikunni kaus Bjarni frekar að verja kerfið og sagði ÁTVR ekki hafa farið út fyrir valdsvið sitt með því að „spyrja spurninga" og það væri ekkert óeðlilegt við það að koma því á framfæri ef menn teldu sig hafa vísbendingar um skattalagabrot. Í samtali við Dagmál Morgunblaðsins reyndi Bjarni að bæta fyrir þessi undarlegu ummæli sín með því að segjast fagna netverslun með áfengi. Það eru aðeins orðin tóm, enda hafa engar breytingar verið gerðar á áfengislöggjöfinni í hans tíð.

* * *

Það virðist sem meginmarkmið Bjarna sé að halda embættismönnum ríkisins ánægðum. Hann sendi kjósendum sínum kaldar kveðjur með fyrrnefndum ummælum til varnar ÁTVR. Þær kveðjur verða ekkert mikið hlýrri þótt reynt hafi verið að bæta upp fyrir þau tveimur dögum síðar.

Týr er skoðanadálkur sem birtist í Viðskiptablaðinu. Áskrifendur geta nálgast blaðið undir Tölublöð, aðrir geta skráð sig í áskrift hér

Fréttabréf
Vikulegt fréttabréf Viðskiptablaðsins þar sem greint er frá því helsta sem gerst hefur í íslensku og erlendu viðskiptalífi.