*

föstudagur, 23. ágúst 2019
Týr
11. ágúst 2019 15:04

Makkað um menninguna

„Allt þetta er auðvitað athyglisverðara vegna þess embættakapals, sem verið er að leggja í menningarmálaráðuneytinu.“

Haraldur Guðjónsson

Það er fróðlegt að lesa viðtal við Lilju Alfreðsdóttur menningarmálaráðherra í nýútkomnu tölublaði Þjóðmála, en þar kemur skýrt fram að stjórnarflokkarnir séu engan veginn á einu máli um það fjölmiðlafrumvarpið, um að setja alla fjölmiðla á ríkisjötuna, sem ráðherrann hefur margkynnt en ekki lagt fram. Varla verður það lagt fram sem stjórnarfrumvarp hafi það ekki stuðning ríkisstjórnarflokkanna?

* * *

Hvað sem því leið, þá hafði ráðherrann það á orði að á hennar vakt myndi Ríkisútvarpið ekki veikjast að nokkru leyti og nefndi þrjár meginröksemdir fyrir því að ekki mætti hrófla við RÚV: Að stofnunin styðji íslenska menningu, að fréttastofan njóti trausts og að hlustun á Rás 1 hafi aukist. Gott og vel, en eru það ekki einmitt rök fyrir því að stórefla Rás 1 en loka hinu dótinu, sem engin sérstök ástæða er til þess að ríkið sé að vafstra við með mjög misjöfnum árangri og ærnum tilkostnaði?

* * *

Allt þetta er auðvitað athyglisverðara vegna þess embættakapals, sem verið er að leggja í menningarmálaráðuneytinu. Þar var staða þjóðleikhússtjóra óvænt auglýst laus til umsóknar, þó núverandi þjóðleikhússtjóra hafi hvergi orðið á í messunni, reksturinn í mjög góðu lagi og sjálfgefið að halda honum áfram. Þetta þótti mörgum skrýtið, alveg þangað til Magnús Geir Þórðarson útvarpsstjóri lýsti því yfir að hann ætlaði að sækja um, sig langaði í leikhúsið aftur.

* * *

Það er raunar ekki skrýtið, svona frá hans bæjardyrum. Honum hefur ekkert orðið ágengt við tiltektina í RÚV, öðru nær. Reksturinn ósjálfbær sem fyrr og skuldastaðan sömuleiðis, en einu ástæðurnar fyrir því að ekki er allt í kaldakoli í Efstaleiti eru þær að RÚV tókst enn einu sinni að sníkja milljarða meðgjöf úr ríkissjóði og lagðist jafnframt í fasteignabrask með lóðina, líkt og það sé í verkahring RÚV. Svo kannski það sé ekki seinna vænna fyrir Magnús Geir að hafa sig á brott, ekki síst þar sem yfirvofandi er stjórnsýsluúttekt um RÚV frá Ríkisendurskoðanda.

* * *

En af hverju ætti hann að vera verðlaunaður fyrir rekstrarslysið í Efstaleiti með því að setja góðan árangur Þjóðleikhússins í uppnám? Út undir vegg á Klausturbar er hvíslað um að það sé vegna þess að ráðherranum standi hjartanlega á sama um Þjóðleikhúsið, en að Lilja vilji mjög gjarnan ráða sinn mann sem útvarpsstjóra og þar kunni hagsmunir hennar og Magnúsar Geirs að liggja saman. En það er verra ef menningin er bara aukastærð hjá menningarmálaráðherranum.

Týr er skoðanadálkur sem birtist í Viðskiptablaðinu. Áskrifendur geta nálgast blaðið undir Tölublöð, aðrir geta skráð sig í áskrift hér

Fréttabréf
Vikulegt fréttabréf Viðskiptablaðsins þar sem greint er frá því helsta sem gerst hefur í íslensku og erlendu viðskiptalífi.