Verðlaunar sjálfan sig

Icelandair var valið markaðsfyrirtæki ársins af ÍMARK 3. nóvember síðastliðinn. Fyrirtækið er sagt hafa tekist á við eldgos, jökulhlaup, óróleika í efnahagsmálum og verkföll stéttarfélaga. Samt sem áður sé reksturinn góður og það hafi meðal annars tekist með því að „tryggja hraðar ákvarðanir með því að gefa millistjórnendum frjálsari hendur og tryggja stuttar boðleiðir og upplýsingaflæði“.

Einn af þessum millistjórnendum er markaðsmaðurinn Guðmundur Arnar Guðmundsson, Brand Manager Icelandair. Guðmundur er líka formaður stjórnar ÍMARK. Má þá kannski segja að Guðmundur hafi verið að verðlauna sjálfan sig?