Ef samruni Arion banka og Kviku banka gengur í gegn yrði um að ræða tíunda samruna eða yfirtöku Kviku frá stofnun fyrirtækisins fyrir áratug síðan. Um leið yrði samruninn sá langstærsti í sögu Kviku og einn sá stærsti sem ráðist hefur verið í innan íslensks fjármálakerfis frá hruni. Þess má þó vænta að Samkeppniseftirlitið setji ýmsa fyrirvara og skilyrði eigi samruninn að fá samþykki þess, til að mynda um aðskilnað eða sölu dótturfélaga eða rekstrareininga. Þar munu togast á kostir stærðarhagkvæmninnar og samkeppnissjónarmið.