Eftir því sem lengri tími líður og ekkert útboð á nýjum Herjólfi fer fram minnka líkurnar á að hægt verði að taka nýja ferju í notkun vorið 2018, eins og áætlanir hafa verið um. Hætt er við að ferjan hefji þá ekki siglingar fyrr en 2019. Þetta kemur fram í morgunblaðinu í dag.
Skipaverkfræðingur sem rætt var við er þessarar skoðunar og undir þetta taka fleiri, m.a. Elliði Vignisson, bæjarstjóri í Vestmannaeyjum. Segist hann vonast til þess að ákvörðun verði tekin á næstu tveimur vikum. Menn séu að falla á tíma með að taka nýja ferju í notkun árið 2018.
Eyjamenn hafa beðið óþreyjufullir eftir niðurstöðu um hvenær útboð á nýrri ferju fer fram en stjórnvöld eiga eftir að ákveða aðkomu ríkisins og hvernig fjármögnun verður háttað. Fyrr verður nýtt útboð ekki dagsett, samkvæmt upplýsingum Morgunblaðsins.
Elliði segir stórar fjárhæðir tapast vegna málsins. Bættar samgöngur séu nauðsynlegar enda stuðli þær að bættu atvinnulífi, þá sérstaklega með tilliti til ferðaþjónustunar.