Hlutabréfaverð flugfélagsins Play hefur hægt og rólega tekið við sér í örviðskiptum í ágústmánuði en gengið hefur nú hækkað um 37,5% í mánuðinum.
Gengi Play tók kipp við opnun markaða í afar litlum viðskiptum og hefur hækkað um 8% í dag.
Play hafði sent neikvæða afkomuviðvörun 21. júlí og lækkaði gengið töluvert undir lok mánaðar. Þrátt fyrir hækkunina í byrjun ágústmánaðar hefur gengi flugfélagsins til að mynda enn lækkað um 18% á síðustu 4 vikum.
Í árshlutauppgjöri félagsins sem birtist í síðustu viku segir að félagið geri ráð fyrir að skila hagnaði á árinu 2026.
Play tapaði 15,3 milljónum dala á öðrum ársfjórðungi 2025, eða sem nemur tæplega 1,9 milljörðum króna, samanborið við 10 milljóna dala tap á öðrum ársfjórðungi 2024.
Flugfélagið Play flutti alls 124.587 farþega í júlí 2025, sem er talsvert færri en á sama tíma í fyrra þegar farþegafjöldinn nam 187.835.
Félagið segir samdráttinn skýrast af því að færri flugvélar hafi verið í áætlunarflugi vegna leigu til annarra flugrekenda.
Samkvæmt Hans Jørgen Elnæs, norskum greinanda og ráðgjafa á flugmarkaði, eru vaxtakjör á breytanlegum skuldabréfum sem Play áformar að gefa út með þeim hærri sem sést hafa í sambærilegum útgáfum í flugiðnaðinum á síðustu árum.
Play tilkynnti fyrir mánuði síðan um að félagið hefði tryggt sér áskriftarloforð um kaup fjárfesta á breytanlegu skuldabréfi að samanlögðu andvirði 2.425 milljónir króna eða um 20 milljónir dala.
Breytanlegu skuldabréfin munu bera 17,5% fasta vexti og er gjalddagi 24 mánuðum eftir útgáfudag.
Engar vaxtagreiðslur fara fram fyrstu 12 mánuði lánstímans, en áfallnir og ógreiddir vextir bætast við höfuðstól á 12 mánaða fresti.
Þar á eftir greiðast vextir mánaðarlega sem nema helmingi áfallinna vaxta vegna hvers mánaðar.
