Andy Byron, forstjóri bandaríska hugbúnaðarfyrirtækisins Astronomer, hefur sagt starfi sínu lausu eftir að myndband af honum og mannauðsstjóra fyrirtækisins, Kristin Cabot, fór í dreifingu eftir Coldplay-tónleika í Massachusetts.
Atvikið vakti mikla athygli, ekki síst á rafræna veðmarkaðnum Polymarket, þar sem yfir tvær milljónir dala voru lagðar undir spurninguna hvort Byron myndi halda starfi sínu.
Á tónleikum Coldplay á Gillette-leikvanginum í Foxborough þann 17. júlí sást Byron faðma Cabot náið á risaskjá leikvangsins.
99% veðjenda spáðu rétt
Þegar þau urðu vör við myndavélarnar reyndu þau að hylja andlit sín, en of seint. Myndskeiðið fór hratt í dreifingu og vöktu viðbrögðin mikla athygli, ekki síst þar sem Byron er kvæntur Megan Kerrigan, sem hefur síðan fjarlægt eftirnafn hans af samfélagsmiðlum.
Á veðmarkaðnum Polymarket, þar sem notendur geta veðjað með rafmyntum á úrslit alls konar viðburða, lagði yfirgnæfandi meirihluti spyrjenda undir að Byron myndi láta af störfum.
Velta á markaðinum nam tveimur milljónum dala samkvæmt Yahoo Finance en 99% þátttakenda spáðu því að hann myndi ekki halda starfi sínu.
Tveimur dögum síðar, þann 19. júlí, gaf Astronomer út yfirlýsingu þar sem fram kom að Byron hefði verið kominn í leyfi en í gærkvöldi var greint frá því að hann hefði sagt starfi sínu lausu.
Meðstofnandi og vörustjóri fyrirtækisins, Pete DeJoy, tók við sem starfandi forstjóri á meðan leitað er að nýjum forstjóra.
Polymarket, sem er með aðsetur í New York og var stofnað árið 2020, er stærsti spámarkaður heims og leyfir notendum að veðja á allt frá pólitík og efnahagsmálum til skemmtana.
