Christian Sewing, forstjóri Deutsche Bank, samþykkti umdeild viðskipti sem hann rannsakaði síðar sjálfur í innri úttekt bankans, úttekt sem varð lykilgagn í sakamáli gegn sex fyrrverandi starfsmönnum bankans.
Samkvæmt skjölum sem Financial Times hefur undir höndum sat Sewing, sem nú gegnir æðsta stjórnunarhlutverki bankans, í nefnd árið 2010 og staðfesti 1,5 milljarða evra viðskipti við ítalska bankann UniCredit.
Um var að ræða svokölluð „enhanced repo“-viðskipti sem fela í sér að banki selur verðbréf með loforði um að kaupa þau til baka síðar á hærra verði. Það jafngildir skammtímaláni með verðbréfum sem tryggingu.
Viðskiptin voru afar gagnrýnd, meðal annars vegna fyrri sambærilegra viðskipta Deutsche Bank við Monte dei Paschi di Siena árið 2008.
Innri úttekt leiddi til ákæru
Árið 2013, eftir að Deutsche Bank hafði breytt bókhaldsmeðferð slíkra viðskipta úr lánaviðskiptum yfir í afleiðusamninga, hóf bankinn innri úttekt á málinu.
Sewing hafði þá tekið við sem yfirmaður innri endurskoðunar og stýrði úttektinni. Niðurstöður hennar voru lagðar fram í ítölsku sakamáli þar sem sex fyrrverandi starfsmenn bankans voru sakfelldir fyrir markaðsmisnotkun og dæmdir í allt að nærri fimm ára fangelsi.
Síðar voru mennirnir sýknaðir af áfrýjunardómstól á Ítalíu, sem vék frá niðurstöðum úttektar Deutsche og taldi upphaflega bókhaldsmeðferðina ekki hafa verið ranga.
Nú hafa fyrrum stjórnendur ákveðið að fara í skaðabótamál gegn bankanum, einn þeirra krefst 152 milljóna evra í bætur í Frankfurt og fleiri undirbúa mál í London.
Samkvæmt skjölunum samþykkti Sewing viðskiptin við UniCredit árið 2010 og sendi meðal annars tölvupóst þar sem hann staðfesti að stjórnin hefði staðfest samninginn.
Þau viðskipti voru talin sambærileg við þau umdeildu viðskipti við Monte dei Paschi frá 2008 en þau síðari leiddu einmitt til breytinga á bókhaldi bankans og úttektarinnar sem Sewing síðar stýrði.
Gagnrýnendur hafa dregið óhlutdrægni úttektarinnar í efa, einkum þar sem Sewing sjálfur hafði undirritað samþykki fyrir einu stærsta viðskiptinu sem úttektin fjallaði um.
Áfrýjunardómstóll á Ítalíu vísaði á bug rökum Deutsche Bank fyrir breytingu á bókhaldi og taldi hana tilraun til að komast hjá auknum regluviðmiðum.
Þrátt fyrir það segir bankinn að sérstök úttekt á vegum þýska fjármálaeftirlitsins BaFin árið 2014 hafi stutt niðurstöður Sewing.
Samkvæmt FT vekur sú staðreynd að Sewing hafi bæði samþykkt viðskiptin og séð um úttekt upp spurningar um siðferðileg viðmið í stjórnunarháttum evrópskra fjármálastofnana.
