Gylfi Magnússon stjórnarformaður Orkuveitunnar segir samtöl í gangi varðandi sölu á hlutum í dótturfélagi OR, Carbfix hf.
„Það er ekki hægt að segja neitt á þessu stigi. Þetta er allt bara í vinnslu og það sama á við um Coda Terminal. Þetta er allt bara í gangi,“ segir Gylfi í samtali við Viðskiptablaðið.
Árið 2022 var Carbfix hf. stofnað þar sem ljóst var að næsti kafli í þróun félagsins og einstakra verkefna kallaði á tuga milljarða króna fjárfestingu.
Í umsögn rýnihóps borgarráðs um stofnun félagsins sagði að ekki væri réttlætanlegt að slíkar fjárhæðir rynnu úr borgarsjóði eða rekstri OR.
Því þyrfti að sækja aukið fé með sölu hlutafjár og/eða lánum. Það hefur þó ekki gerst enn.
Í desember 2024 samþykkti stjórn OR að hækka lánalínu Carbfix í 12 milljarða króna, um 80 milljónir evra, til ársloka 2026. Gert er ráð fyrir að lánalínan verði endurgreidd árið 2027.
Spurður um hvort hann telji að það muni takast að selja Carbfix hf. fyrir árslok 2026 segir Gylfi svo vera.
„Það er reiknað með því að það gangi eftir,“ segir Gylfi.
Líkt og Viðskiptablaðið greindi frá í gær lauk Carbfix hf. rekstrarárinu 2024 með skuldir upp á 43,9 milljónir evra, um 6,3 milljarða króna á gengi dagsins.
Um er að ræða 79% aukningu á milli ára en félagið skuldaði 24,5 milljónir evra í árslok 2023. Langtímaskuldir til Orkuveitunnar námu 30,6 milljónum evra í árslok 2024, samanborið við 14,6 milljóna skammtímaskuld við OR árið áður.
Orkuveitan hefur því lagt félaginu verulegt fjármagn til rekstrar og breytt skammtímaskuldinni í langtímalán.
Carbfix tapaði 8,1 milljón evra sem samsvarar tæpum 1,2 milljörðum íslenskra króna á gengi dagsins. Uppsafnað tap félagsins síðustu tvö ár er 11,3 milljónir evra.
Heildareignir félagsins voru bókfærðar á 40,5 milljónir evra í árslok 2024 sem er aukning úr 29,2 milljónum evra árið 2023.
Mestur hluti eigna Carbfix er bundinn í varanlega rekstrarfjármuni, sem námu 26,2 milljónum evra í lok árs, auk óefnislegra eigna að fjárhæð 3,6 milljónir evra.
Eiginfjárhlutfallið í mínus 8,4%
Í árslok 2023 var eigið fé félagsins jákvætt upp á 4,7 milljónir evra en í lok árs í fyrra var það neikvætt um 3,4 milljónir evra.
Eiginfjárhlutfall Carbfix var -8,4% í lok árs.
Neikvætt eigið fé gefur til kynna að skuldir félagsins séu meiri en eignir þess, sem getur takmarkað möguleika á lántöku á almennum markaði og kallar því á áframhaldandi stuðning frá Orkuveitunni.
Heildartekjur ársins námu 10 milljónum evra, samanborið við 5,5 milljónir evra árið 2023.
Tekjurnar skiptust í ráðgjafarþjónustu, skattaívilnanir o.fl., sem námu rúmum 2 milljónum evra, og tekjur vegna verkefnaþróunar sem námu 7,7 milljónum evra.
Verkefni Carbfix eru fjármögnuð þannig að allur kostnaður er endurgreiddur af viðskiptavinum eða styrktaraðilum og tekjur og útgjöld eru því bókuð á sama tíma.
Kostnaður við verkefnaþróunina er því bókfærður á sömu upphæð, 7,7 milljónir evra, og áhrif teknanna á afkomu Carbfix eru því í reynd engin.
Rekstrargjöld jukust úr 7,8 milljónum evra í 16,1 milljón evra, einkum vegna hærri kostnaðar við verkefnaþróun.
EBITDA var neikvæð um 6,1 milljón evra og EBIT var neikvætt um 7,2 milljónir evra í lok árs 2024.
Fjármagnsgjöld námu 2,7 milljónum evra og gengistap 1,1 milljón evra.
Tap fyrir skatta var 10,8 milljónir evra og hreint tap ársins var 8,1 milljón evra sem er rúmlega þreföldun frá 2,2 milljónum evra í fyrra.
Í ársreikningi OR er bent á að fjárfestingar og lánveitingar til Carbfix séu áhættusamar þar sem félagið sé á vaxtarog þróunarstigi án sjálfbærs tekjuflæðis.
Tekið er fram að stefnt sé að því að fá meðfjárfesta að verkefnum til að minnka áhættu, en að árangur ráðist af því hvort Carbfix nái að ljúka samningum og framkvæmdir gangi samkvæmt áætlun.
