HS Veitur hafa ráðið Ingu Láru Jónsdóttur sem framkvæmdastjóra nýs sviðs þjónustu og snjallra lausna. Ráðningin er liður í skipulagsbreytingum sem tóku gildi um síðustu áramót og markar jafnframt tímamót í sögu fyrirtækisins: Í fyrsta sinn verður jafnt kynjahlutfall í framkvæmdastjórn HS Veitna.
Nýja sviðið hefur það að markmiði að efla þjónustu og styðja við stafræna umbreytingu HS Veitna, sem þjónustar rúmlega 92 þúsund íbúa og fjölda stórfyrirtækja á veitusvæði sínu. Fyrirtækið er þekkingar- og þjónustufyrirtæki sem sinnir rekstri samfélagslega mikilvægra innviða á sviði veitustarfsemi.
Inga Lára er viðskiptafræðingur með MS-gráðu í forystu og stjórnun og býr að víðtækri reynslu úr atvinnulífinu. Hún starfaði síðast sem útibússtjóri hjá Securitas á Reykjanesi frá árinu 2022, þar sem hún bar ábyrgð á rekstri útibúsins í heild. Áður sinnti hún starfi markaðsstjóra hjá Lagardère.
Í nýju hlutverki sínu mun hún leiða teymi sem ber ábyrgð á þjónustu við viðskiptavini og þróun snjallra lausna.
„Það fylgja bæði tækifæri og áskoranir breytingum sem þessum, en ég er algjörlega sannfærð um að í sameiningu eigum við eftir að efla sviðið og veita viðskiptavinum okkar enn betri þjónustu. Ég er mikil keppnismanneskja og hef brennandi áhuga á tækniframförum og stjórnun – sérstaklega þjónustustjórnun. Því er ég full tilhlökkunar að leggja mitt lóð á vogarskálarnar og leiða frábært teymi þjónustu og snjallra lausna hjá HS Veitum áfram veginn á þessum spennandi tímum,“ segir Inga Lára Jónsdóttir.
„Við erum virkilega ánægð með að fá Ingu Láru til liðs við okkur. HS Veitur reka samfélagslega mikilvæga innviði sem færa viðskiptavinum lífsgæði. Í kjölfar stefnumótunarvinnu á síðasta ári var tekin ákvörðun um að gera þjónustu við viðskiptavini hærra undir höfði með því að stofna sérstakt svið utan um þessa einingu. Inga Lára hefur fengið það verðuga verkefni að móta þetta nýja svið og leiða teymi þjónustu og snjallra lausna,“ segir Páll Erland, forstjóri HS Veitna.
