Íslandsbanki hf. hefur gengið frá kaupréttarsamningum við 743 starfsmenn bankans í samræmi við kaupréttaráætlun sem samþykkt var á hluthafafundi 30. júní 2025.
Samkvæmt áætluninni fá starfsmenn rétt til að kaupa hluti í bankanum á hagstæðu verði á næstu fimm árum.
Rétturinn nær til allra fastráðinna starfsmanna bankans, að undanskildum starfsmönnum innri endurskoðunar, og er markmið hans að samræma betur langtímahagsmuni starfsfólks og bankans.
Á hverju ári frá og með 2026 til og með 2030 öðlast hver starfsmaður rétt til að kaupa hlutabréf fyrir allt að 1.500.000 krónur, að lágmarki 100.000 krónur.
Hámarksheildarupphæð fyrir hvern starfsmann er því 7.500.000 krónur. Nýtingartími kaupanna hefst í ágúst ár hvert, eftir birtingu sex mánaða uppgjörs bankans.
Kaupverð hlutabréfanna er ákvarðað sem vegið meðalverð í viðskiptum með hluti bankans í kauphöll síðustu tíu viðskiptadaga fyrir undirritun samnings. Í ár er það verð 126,4 krónur á hlut.
Að sögn bankans hafa samtals 743 starfsmenn gert kaupréttarsamninga og ná þeir til allt að 8.817.181 hlutar á ári, miðað við fulla nýtingu.
Heildarumfang samninganna á fimm ára tímabili gæti því numið um 44 milljónum hluta, sem á núverandi gengi jafngildir rúmlega 6,5 milljörðum króna.
Samkvæmt kaupréttaráætluninni þurfa starfsmenn að halda hlutum í að lágmarki tvö ár eftir kaup til að njóta skattalegrar ívilnunar. Kaupréttinn verður að nýta innan fimmtán daga frá birtingu árshlutauppgjörs á öðrum ársfjórðungi ár hvert. Eftir þann frest fellur rétturinn niður fyrir það ár.
