Í árshlutauppgjöri Landsbankans um miðjan mánuð var greint frá áhrifum Capital Requirements Regulation III (CRR III), nýs regluverks Evrópusambandsins, á eignir bankans en áður höfðu Kvika, Arion og Íslandsbanki birt slíkar upplýsingar.
Regluverkið, sem átti að taka gildi í sumar, verður að öllum líkindum innleitt í haust og mun lækka áhættugrunn Landsbankans um 64 milljarða króna og hækka eiginfjárhlutfall bankans úr 24,0% í 25,0%.
Eins og Viðskiptablaðið hefur greint frá er áætlað að nýja regluverkið lækki heildaráhættuvegnar eignir (REA) íslenskra banka um á annað hundrað milljarða króna.
Nýlegar breytingar á regluverkinu gætu þó aukið það hlutfall enn frekar þar sem Evrópska bankaeftirlitsstofnunin (EBA) ákvað í byrjun júlí að breyta viðmiðunarreglum um framkvæmdarlán sem höfðu áður mjög neikvæð áhrif á íslenska banka og hækkuðu áhættugrunn þeirra sem og eiginfjárbindingu.
Í regluverkinu var upphaflega lagt upp með að hægt yrði að lækka áhættuvog lánveitinga til framkvæmda úr 150% niður í 100% ef verktaki legði fram „verulegt eigið fé“.
Samkvæmt drögum EBA átti þetta „verulega eigið fé“ að nema 35% af söluverðmæti eignar sem verið var að fara að byggja. Á Íslandi hefur árum saman verið miðað við eiginfjárhlutfall sem er í kringum 25% til 30% af framkvæmdakostnaði.
Þetta yrði því töluverð breyting en samkvæmt óformlegri könnun SFF hjá bönkunum hefði ekkert framkvæmdalán á Íslandi náð þessu eiginfjárhlutfalli og því hefðu öll framkvæmdalán verið í 150% áhættuvog.
Þessi hætta virðist þó liðin hjá í bili, því samkvæmt nýjum viðmiðunarreglum EBA þurfa verktakar nú einungis 25% eiginfjárframlag svo að framkvæmdalán falli undir 100% áhættuvog. Jákvæðu áhrif nýja regluverksins eru því meiri en áður var talið.
Þótt hlutfallsleg áhrif nýja regluverksins séu mest hjá Kviku banka þá losnar um stærri fjárhæð í Landsbankanum en öðrum kerfislega mikilvægum bönkum samkvæmt útreikningum bankanna sjálfra.
Þar sem ríkissjóður á 98,2% hlut í bankanum hefur Landsbankinn ekki sama svigrúm til að ráðast í endurkaup á eigin bréfum.
Í samtali við Viðskiptablaðið svarar Hreiðar Bjarnason fjármálastjóri Landsbankans nánar spurningum um áhrif regluverksins á fjárhagsstöðu bankans og mögulegar ráðstafanir í kjölfarið.Áskrifendur geta lesið ítarlega umfjöllun Viðskiptablaðsins hér.
