Nýr tollasamningur milli Evrópusambandsins og Bandaríkjanna kallar á endurskoðun á rekstri hjá dönskum útflutningsfyrirtækjum. Forstjórar útflutningsfyrirtækja í Danmörku segja að samningurinn muni auka kostnað og jafnvel tap. Þeir fagna því þó að óvissunni hafi verið eytt, samkvæmt Børsen.
Samningurinn, sem undirritaður var á sunnudag, felur í sér almennan 15 prósenta toll á evrópskar vörur sem fluttar eru til Bandaríkjanna. Þetta hefur bein áhrif á fyrirtæki þar sem Bandaríkin eru þeirra stærsti markaður.
Jan Warrer, forstjóri Pressalit, sem sérhæfir sig í hreinlætisbúnaði og er leiðandi á sviði búnaðar fyrir fatlaða í Bandaríkjunum, segir ljóst að fyrirtækið verði að bregðast hratt við:
„Bandaríkin eru lykilmarkaður fyrir okkur og við verðum að laga okkur að nýjum veruleika.“
Pressalit hyggst hækka verð til bandarískra viðskiptavina en ætlar að gera það með ígrunduðum hætti. Markmiðið er að bæta virði vörunnar og þjónustunnar í stað þess að velta tollaálaginu beint yfir á viðskiptavininn:
„Auðveldast væri að hækka verðið um 15 prósent, en við viljum fremur færa viðskiptavinum aukið virði í formi þjónustu og ráðgjafar.“
Fyrirtækið, sem hefur 300 starfsmenn og veltir 385 milljónum danskra króna á ári, skoðar nú jafnframt möguleikann á að hefja framleiðslu í Bandaríkjunum. Warrer segir þó ekki liggja fyrir ákvörðun en telur eðlilegt að kanna málið ítarlega.
Afpantanir nýr veruleiki
Hjá lyftuframleiðandanum Omme Lift í Suður-Jótlandi eru áhrifin þegar farin að koma fram.
Lars Omme, forstjóri fyrirtækisins, segir bandarískan dreifingaraðila hafa afpantað pantanir eftir að tollarnir voru kynntir, þar sem kaupendur vilji ekki taka á sig kostnaðaraukann:
„Þetta er gríðarlega svekkjandi. Við þurfum að ræða hvernig tollkostnaðurinn skiptist ef hann telur sig ekki geta selt vörurnar áfram.“
Bandaríkjamarkaður stendur undir um 40 prósentum af heildartekjum Omme Lift og því eru áhrifin þýðingarmikil.
Forstjórinn segir mögulegt að flytja hluta vinnsluferla til Bandaríkjanna eða beina sjónum að nýjum mörkuðum. Lönd á borð við Egyptaland, Sádi-Arabíu og Sameinuðu arabísku furstadæmin eru þegar komin á radarinn.
Þrátt fyrir aukinn kostnað fagna stjórnendur því að loks sé komin skýr tollaregla, eftir margra mánaða óvissu og misvísandi yfirlýsingar:
„Við höfum þurft að aðlaga okkur dag frá degi eftir yfirlýsingum stjórnmálamanna. Nú vitum við hvar við stöndum og getum brugðist við,“ segir Lars Omme.
Jens Poulsen, forstjóri tískufyrirtækisins DK Company, tekur í sama streng. Hann segir samninginn veita vissu, þó að tollarnir sjálfir séu þungbærir.
„Það skiptir ekki öllu máli hvort manni líkar við samninginn eða ekki – nú vitum við hver tollaprósentan er og getum tekið mið af því.“
