Bæjarráð Akraness fordæmir harðlega fyrirhuguð áform Evrópusambandsins um að leggja verndartolla á kísiljárn og krefst þess að ríkisstjórn Íslands geri allt sem í hennar valdi stendur til að koma í veg fyrir að fyrirhugaðir tollar ESB á kísiljárn verði að veruleika.
Í tilkynningu frá bæjarráði segir að slíkir tollar gætu haft alvarleg áhrif á eitt mikilvægasta atvinnufyrirtæki bæjarfélagsins, Elkem á Grundartanga, og jafnframt sett í uppnám umfangsmikla uppbyggingu og framtíðarfjárfestingar á iðnaðarsvæðinu.
Þá er ekki ljóst af fréttum hvort hagsmunum Norðuráls á Grundartanga verði í framhaldinu ógnað með tollum á álframleiðslu.
„Verði það niðurstaðan blasir við fordæmalaust áfall fyrir atvinnulíf á Akranesi,“ segir í tilkynningu bæjarráðs.
Bæjarráð vekur sérstaka athygli á að Elkem sé ekki einangrað fyrirtæki í rekstri sínum, heldur burðarás í iðnaðarumhverfi sem sé nú að taka miklum breytingum.
Á Grundartanga standi nú yfir undirbúningur umfangsmikilla fjárfestinga í nýjum framleiðslufyrirtækjum sem reiða sig á samstarf við Elkem.
Einnig sé unnið að nýsköpunarverkefnum sem miði að bættri nýtingu hráefna og orku í anda hringrásarhagkerfisins.
„Tjón á rekstri fyrirtækja á Grundartanga yrði alvarlegt efnahagslegt áfall og hefði með beinum hætti áhrif á afkomu þjóðarbúsins. Þá er ljóst að atvinnu og afkomu hundraða einstaklinga er ógnað með beinum hætti,“ segir í yfirlýsingunni.
„Áform ESB eru algjörlega óskiljanleg og í engu samhengi við stefnu sambandsins um að gæta að viðkvæmum aðfangakeðjum fyrir mikilvæg aðföng til iðnaðarframleiðslu. Bæjarráð krefst þess að ríkisstjórn Íslands mótmæli nú þegar harðlega slíku broti á EES samningnum. Bæjarráð óskar þegar í stað eftir fundi með forsætis-, utanríkis- og atvinnumálaráðherrum um þá alvarlegu stöðu sem blasir við á allra næstu dögum,“ segir þar enn fremur.
