Hlutabréfaverð líftæknilyfjafyrirtækisins Alvotech hækkaði um rúm 5% í dag og lokaði gengið í 1080 krónum.
Gengi félagsins byrjaði daginn á lækkunum og fór gengið niður í 1000 krónur á hlut. Um það leyti sem opnað var fyrir viðskipti í Bandaríkjunum hækkaði gengið þó að nýju og lokaði deginum 5% hærra en á föstudaginn.
Líkt og Viðskiptablaðið greindi frá í dag hafði gengi félagsins verið á niður eftir birtingu árshlutauppgjörs í síðustu viku.
Félagið greindi frá því í uppgjörinu að tekjur af sölu lyfja námu 204,7 milljónum dala á fyrri helmingi ársins, sem er yfir 200% aukning frá sama tímabili í fyrra (65,9 milljónir dala).
Rekstrarhagnaður félagsins var 28,6 milljónir dollara á fyrri helmingi ársins, samanborið við 43,4 milljónir dollara á sama tíma í fyrra. Félagið rekur mismuninn einkum til hærri tekna af leyfisgreiðslum á fyrri helmingi síðasta árs en á móti komi auknar tekjur af vörusölu á lykilmörkuðum á fyrri hluta þessa árs.
Gengi Iceland Seafood International hækkaði einnig í viðskiptum dagsins. Hlutabréfaverð félagsins fór upp um 2% í örviðskiptum í dag. Dagslokagengið var 5,2 krónur á hlut.
Gengi Haga hækkaði um tæp 2% í 200 milljón króna viðskiptum. Dagslokagengið var 108 krónur á hlut sem er um 4% hærra en í ársbyrjun.
Hlutabréfaverð Amaroq og Play hélt áfram að lækka en Play fór niður um 2% og Amaroq tæp 2%.
Úrvalsvísitalan hækkaði um 0,32% og var heildarvelta á markaði 1,3 milljarðar.
